لقاء صحفي مع الكاتبة سلوى فاضل

 

السلام عليكم ورحمة الله وبركاته
دعونا نرحب معا بهذه الموهبة المتألقة فهيا معا لنبدأ 
الاسم

سلوى فاضل أحمد سولي
السن عيب ما تقولش كده 
المحافظة القاهرة
الموهبة الكتابة
لقبك سولي بس كده
هل بإمكانك أن تحدثنا عن نفسك ! بصي يا سيتي زوجة وأم طالع عيني الحمد لله خريجة تجارة خارجية من شوية سنين كتيره كده عندي موهبة الكتابة من زمان بس أهملتها سنين لحد ما ربنا أراد ودورت على نفسي ورجعت من تاني لقيت إني محتاجة تدريب وتوجيه فبدأت أدور لحد ما دخلت ورشة ومضة أول ورشة ليا وكانت وش السعد والحمد لله وبعدها دخلت كذا ورشة.
كيف إكتشفت موهبتك 
في ثانوي كنت ساعات أسرح كده وأعمل في خيالي أشخاص وحوارات ما كانش وقتها في فيسبوك وكده حتى النت كان عزيز مش في كل البيوت لما تخرجت بعدت كتير ومن أربع سنين فاتوا رجعت تاني.
متى بدأت الكتابة 
وقت الكورونا مصائب قوم عند قوم فوائد مع انتشار الكرونا الدراسة ألغيت والحياة وقفت والفراغ زاد فلقيت دماغي راحت من تاني تنسج وتنبي قصص وحكايات.
من أول مشجع لك
زوجي وبعده أختي الكبيرة.
ماهي الصعوبات التي واجهتها وكيف تخطيتها 
أدوات اللغة كانت رايحة مني شوية خصوصا إني كنت بدور في دائرة البيت والأولاد وبس طبعا بدأت أكتب بالذاكرة لحد ما دخلت ورش الكتابة استعادت أدوات الكتابة وعرفت أنظم أفكاري ورجعت أذاكر من تاني.
هل تعتقد أنك ستتخلى يوما عن موهبتك!
الصراحة لأ الكتابة عملت لي تصالح مع النفس كمان بقى عندي أصدقاء كتير ما أقدرش أستغنى عن معرفة الناس الحلوة دي ولا الشخصيات اللي بيكونوا أصحابي وأنا بجسدهم على الورق.
ماذا تمثل لك موهبتك 
حياتي.
أرنا بعض من كتاباتك 
تتوارى عن الأنظار تسجل وتوثق الأحداث المحيطة بها من دمار تدوي من حولها أصوات القذائف تحول طقس المكان لباحوراء الصيف بالرغم من إنهم بشدة زمهرير الشتاء فالنيران مندلعة بالأرجاء تعج المكان فتأكل كل ما تحط عليه من مباني وأثاث وأناس إنها الحړب نعم هي الحړب.
من هو مثلك الأعلى في هذا المجال 
من زملاء الفيس في كتير خصوصا من درس لي بالورش الكتابية مش هاقول اسماء عشان ما حدش يزعل مني.
هل ترى أن التواصل الاجتماعي له دورا في هذا المجال 
أيوه طبعا بس للأسف سلاح ذو حدين لان مش كل من يقرأ عليهم ناضجين وبالتالي لا يقابل بعض النصوص الجيدة قبول كبير والعكس صحيح يعني الأقلام الحديثة الجيدة تلاقي صعوبات كبيرة.
ما هي طموحاتك 
بصي أنا الحمد لله شاركت بمعرض الكتاب مرة نفسي يبقوا كتير وابقي كاتبة كبيرة وتتحول حاجة من أعمالي لعمل تلفزيوني وأكسب بقى وأشتهر بقى 
رسالة توجهها لكل كاتب مبتدئ 
يقرأوا لكتاب يستفادوا منهم يهتموا بمفردات اللغة والأسلوب الموهبة مهمة بس لازم نثقلها يكتبوا في جوانب مفيدة مش أي حاجة تجيب متابعين وخلاص.